屈福特神锋轰60码金球 12码反而宴客

xcy232323

       

        周二(9日)凌晨英冠大战，屈福特作客被西布朗逼和1比1，「大黄蜂」球星伊斯美拿沙亚成为焦点人物，呢位塞内加尔前锋上半场离门60码轰入「碧咸式」超级金球，可惜伊斯美拿沙亚喺比赛尾後12码宴客，成为球队失分罪人。
        今季降班英冠嘅屈福特，坐拥伊斯美拿沙亚、艾曼纽丹尼斯同祖奥柏度呢条豪华锋线，自然被视为升班热门，今场作客西布朗12分钟就先拔头筹，伊斯美拿沙亚喺中圈线後面拎波波，见西布朗门将走咗出嚟，第一时间大脚射入空门，英国《每日邮报》统计途程足足60码，而由起脚到入波时间只系2.61秒，难怪被视为「全年金球」热门。
        不过屈福特之後无以为继，完半场前被西布朗追成平手，屈福特喺73分钟再获12码，不过60码入到波嘅伊斯美拿沙亚，喺12码点反而射唔入，最终两队踢成1比1平手。西布朗领队布鲁士赛後表示：「我唔知应该为沙亚拍手掌，定系要问下龙门去咗边？一个好出色嘅球员入咗个精彩入球，不过我都为我哋门将高兴，佢救12码帮球队拎番1分。」