前曼联总监准备「恶意收购」 踢走格拉沙

xcy232323

       

        曼联近年成绩低迷，管理上亦受尽批评，班主格拉沙家族更系球迷痛恨对象，前曼联总监米高礼顿近日放风，表示正联络其他富商，准备对曼联提出「恶意收购」，目标系将格拉沙家族踢出曼联。
        现年70岁嘅米高礼顿，喺1989年至92年间加入曼联董事局并曾出任总监，佢喺1989年已经提出过用2,000万镑收购曼联，但最终计划失败。米高礼顿日前喺曼联球迷网上节目《The Religion》表示：「所有人都知曼联需要新班主，呢个系我嘅目标，呢个计划已经有进展，我同好多人倾过，得到好多富商支持，依家准备紧收购文件，记住，呢次系一次恶意收购。」
        被问到「恶意收购」嘅性质，米高礼顿表示：「恶意收购代表就算格拉沙冇打算卖曼联，我哋仍然会提供一个合法、强力而适当嘅商业报价，话畀对方知『你已经冇得拣，你时候离开』。」米高礼顿未有透露实际开价，但就好快就会出手：「我哋财团已蓄势待发，资金准备好，文件亦都搞紧，我哋希望拉特克利夫(英国富商)加入，佢可以解决好多问题，但就算佢未加入，我保证短时间内都会正式进行今次收购行动。」