皇马勇夺欧超盃 宾施马破纪录擸硬金球奖

xcy232323

       

        皇家马德里喺西甲开锣前再赢冠军，呢支欧联盟主周四(11日)凌晨欧超盃，凭阿拉巴同宾施马各建一功，以2比0击败欧霸冠军法兰克福，历史性第5次捧走欧超盃。法国前锋宾施马勇态持续，今场入波令佢超越传奇前锋鲁尔，成为皇马史上入波第2多球员，连教练安察洛堤都话金球奖已系佢囊中物。
        皇马今仗以欧联决赛相同阵容出战，新兵鲁迪格同曹亚文尼先任後备，合作纯熟嘅皇马37分钟先拔头筹，阿拉巴接应卡斯米路头槌二传，龙门口轻松射入。换边後皇马继续控制战局，卡斯米路曾远射中楣弹出，去到65分钟宾施马禁区顶第1时间抽射，奇云查普扑到都入，皇马最终轻松赢2比0捧盃。
        今次系皇马历来第5次夺得欧超盃，追平AC米兰同巴塞隆拿成为赢最多次欧超盃嘅球队，而呢个冠军亦系皇马史上第98个大赛冠军，今季有望挑战「100冠」伟业！皇马自2000年洲际盃输畀小保加後，从未试过喺决赛输畀西班牙以外球队，期间经历12次决赛全部捧盃，相当恐怖。
        法国前锋宾施马今场又入波，佢喺皇马累积324个入球，超越传奇前锋鲁尔(323球)成为皇马史上第2射手，仅次於入450球嘅C朗拿度。由於今年金球奖改以球季作为结算单位，颁奖礼喺世界盃前举行，赢晒欧联、西甲同欧超盃嘅宾施马几乎肯定攞奖，教练安察洛堤赛後表示：「宾施马有力赢金球奖，仲有疑问？我睇就冇！」